السلام عليكم ورحمة الله وبركاته


كيف حالكم يا اعضاء ان شاء الله تمام،،المهم موضوع هو توا زي ماتعرفوا رمضان قريب ان شاء الله وفي هدا الشهر المبارك تصير هلبه حاجات ومن هده الحاجات

حول من قدامي حول وانتم تحرقو في الاعصاب ،، باهي غر اهداء يا خوي راهو كلنا صايمين... صايمن ... و كان صايمين؟؟ راهو يحترم نفسه،،، و الله يا اخ راهو كلمته و قالي مش قصدي شئ ،،،،تي كيف مش قصده شئ ،،، والله لو مش صيام الا لما ناكله وجهه ،،،باهي باهي يا خونا غر وسع بالك ،،،بالي واسع لين شركوه النماذج هذه ......

السلام عليكم و عليكم السلام ،،،لاباس خيركم اتصيحو

شئ ايخيلي الواحد يمشي ايصيم في الامازون علاش يا خوي علاش اتقول هكي،،،،،، انت مشبحتش الاخ شنو دارلي؟؟؟؟؟ وكنهاذا راك ماتتكلمش بهدؤ علاش شنو دارلك باش حمقت،،،،، اني حمقت و الله باين عليك الا نفس التركيبة انت و ياه هكي فكني منك و منه و برو علي حالكم و خلوني في حالي ............

استهدي بالله يا خونا الدنيا صيام و عبادة و محبة خيركم تتعاركو ،،،،،ايه علينا منين طلعلي حتى هذا ،،،،لا منين طلعتلك ولا منين ماطلعتلكش اني قلت سؤال و قبل نبي انحاول انهدي الموضوع لكن ان شاء الله تنحرقو اني شن دخلي فيكم،،،،، شنو ننحرقو و الله ماتتحشم و عارف روحي اليوم بنترزا فيك ،،،،،انت يا مصيص تترزا فيا علاش شنو ملوح لقيتني ولا تبني انوريك منو انكون ........... طز فيك و في ناسك و هي تعالو كلكم

طخ طخ طاخ
خطمو الناس و حزو الناس و كل واحد فش غله في الثاني و صارت عركة و دم و خباش و ضرب و في الاخير كل واحد مشي في حاله السبب ان الاول ضرب كلاكس للثاني باش يمشي لان السيمافرو اخضر
ممكن حشيشة دخان ممكن نقص سكريات ممكن حشيشة قهوة او شاهي ممكن السهور للصبح ممكن تكاليف الحياة ممكن عدم ممارسة الحياة الروتينية اسباب كثيرة تسبب هذه المشاكل و لكنها غير مقنعة للبعض الاخر و البحث عن اجابة سؤال لماذا تزداد عصيبة الناس في رمضان مجهولة

في أمان الله

هانيبال

بقلمي

تم نشرها من قبلي في منتديات اخرى

الله الله عليك ياهانيبال

بجد هذا اللى صاير

انا الاخرى ديما نتساءل عن السبب وراء هذه العصبية المفتعلة على مواقف تافهة
شئ بجد يحير

معقولة الصيام اللى فى الاصل الحكمة منه الصبر والحلم هو الذى تسجل فيه أعلى درجات العصبية والغضب لاتفه الاسباب؟؟؟؟؟؟؟؟؟؟

لكن عندى نقطة حابة نعرضها وهى ان هذه الحالات التى نراها من قلة الصبر والغضب وعدم التحكم فى النفس و................و.................و.............. ........

كلها كانت من قبل جنس أدم فقط ...لماذا ؟؟؟؟

عموما رائع جدا ماخطه قلمك هانيبال بجد أبدعت

اعتقد ان السبب هو النفوس الضعيفة والجري وراء ملذات الحياه ..
كان السلف الصالح ينتظرون شهر رمضان بفارغ الصبر بل هم من يطرقون بابه لانهم يعرفون كم فيه من الاجر والثواب العظيم ويحرصون فيه على التراحم والتوادد وعلى الإحسان إلى الاخرين والدفع بالتي هي أحسن ..
يقول رسولنا الكريم صلى الله عليه وسلم: "الصيام جنة، فإذا كان يوم صوم أحدكم فلا يرفث ولا يصخب - وفي رواية: (ولا يجهل) - فإن امرؤ سابه أو قاتله فليقل: إني صائم، مرتين " (متفق عليه عن أبي هريرة).

اما بالنسبة لكثير من الناس في وقتنا الحالي رمضان عندهم هو الذي يطرق بابهم فيتفاجؤن به ويرتبكون لمجيئه فهو بالنسبة لهم ضيف ثقيل سيقيم عندهم شهرا كاملا ويمنعهم من ملذاتهم وأهواء نفوسهم فيتضايقون لوجوده وتتكدر نفوسهم لحلوله فينعكس ذلك على معاملاتهم وتصرفاتهم خلال شهر رمضان فتجد في معاملاتهم غلظة ويعلو على سلوكهم الغضب والعصبية .

مشكور اخي هانيبال على هذا الطرح المميز ودمت متميزا

بريق الماس
سي لامين
سيدة الاحساس
اشكركم علي الرد وبارك الله فيكم
وكل عام وانتم بخير